ഐശ്വര്യാറായുടേയും അഭിഷേക് ബച്ചന്റെയും മകളുടെ ജാതകം - വിശദ ജ്യോതിഷ പഠനം

ലോക പ്രശസ്തരായ മാതാപിതാക്കള്‍ , ലോക പ്രശസ്തരായ മുത്തച്ഛനും മുത്തശ്ശിയും. ഇവരെല്ലാവരും ഒരു മഹാരാജ്യത്തിലെ ജനങ്ങള്‍ ആരാധിക്കുന്നവര്‍ . ഇവരുടെ തലമുറയിലെ അടുത്ത കണ്ണിയായ് ജനിക്കുക എന്നു പറയുന്നതു തന്നെ മഹാ ഭാഗ്യമല്ലേ? പറഞ്ഞുവരുന്നത് ആരുടെ കാര്യമാണെന്നു പ്രത്യേകം പറയേണ്ടതില്ലല്ലോ ? 'ബേബി ബി' വിശ്വസുന്ദരി ഐശ്വര്യാ റായുടേയും അഭിഷേക് ബച്ചന്റേയും മകള്‍ . ഇവിടെ ഒരു ജ്യോതിഷ പഠനത്തിലൂടെ ആ കുട്ടിയുടെ ജാതകം എങ്ങനെ ജ്യോതിഷ പ്രവചനത്തെ സാധൂകരിക്കുന്നു എന്ന് വിശദമായ് പ്രതിപാദിക്കുന്നു. 

ഈ കുട്ടി ജനിച്ചിരിക്കുത് 16 നവംബര്‍ 2011, രാവിലെ 5.30 മഹാരാഷ്ട്ര (മുംബൈ), ചൊവ്വാഴ്ച പുണര്‍തം നക്ഷത്രം മൂന്നാം പാദം. അതായത് മലയാളം വര്‍ഷം 1187 തുലാം 30, ശുക്ര കാലഹോരയില്‍ , കൃഷ്ണപക്ഷ പഞ്ചമി, കഴുത കരണത്തില്‍ . ഈ പെണ്‍കുട്ടി തുലാം ലഗ്നമായ്, ലഗ്നത്തില്‍ യോഗകാരകനായ ശനി പതിനൊന്നാം ഭാവാധിപനായ രവിയോട് യോഗം ചെയ്ത് നില്ക്കുന്നു. മൂന്നാം ഭാവാധിപനും ആറാം ഭാവാധിപനുമായ വക്രനായ ഗുരു നിവൃത്തി സ്ഥാനമായ ഏഴില്‍ നിന്ന് ലഗ്നത്തിലേക്ക് ദൃഷ്ടി ചെയ്യുന്നു. 

സാധാരണയായ് പന്ത്രണ്ടു വയസ്സു കഴിയാതെ ജാതകം എഴുതിക്കരുതെന്ന് പഴമക്കാര്‍ പറയാറുണ്ട്. അതിനു വ്യക്തമായ പ്രമാണം" ജാതക പാരിജാതം " എന്ന ജ്യോതിഷ ഗ്രന്ഥത്തില്‍ പറയുന്നു. 

" ആദ്യേ ചതുഷ്‌കേ ജനനീ കൃതാഘൈ 

മ്മദ്ധ്യേതു പിത്രാര്‍ജ്ജിത പാപ സഘൈ 

ബാലസ്തദന്ത്യാസു ചതുശ്ശര.സു 

സ്വകീയ ദോഷൈസ്സമുപൈതി നാശം. "

(ജാതക പാരിജാതം - അദ്ധ്യായം 4 ശ്ലോകം 2) 

ആദ്യത്തെ പന്ത്രണ്ടു വര്‍ഷത്തെ മൂന്നായ് ഭാഗിച്ചാല്‍ ആദ്യത്തെ നാലു വര്‍ഷകാലത്തില്‍ കുട്ടിയുടെ മാതാവിന്റെ ദോഷങ്ങള്‍ ഹേതുവായും, രണ്ടാമത്തെ നാലുവര്‍ഷങ്ങളില്‍ അച്ഛന്റെ പാപങ്ങളാലും മൂന്നാമത്തെ നാലുവര്‍ഷകാലങ്ങളില്‍ കുട്ടിയുടെ പൂര്‍വ്വ ജന്മപാപങ്ങള്‍ ഹേതുവായും കുട്ടിക്കു ഹാനിയുണ്ടാകാം. അതു കൊണ്ടാണ് പന്ത്രണ്ടു വയസ്സിനുള്ളില്‍ ജാതകം എഴുതിക്കരുതെന്നു പറയുന്നത്. എഴുതിക്കുന്നതില്‍ തെറ്റില്ല. പക്ഷെ പ്രവചനത്തില്‍ ഈ സമയത്തെ ആയുസ്സിനു ദൈവജ്ഞനു പ്രവചിക്കാന്‍ സാധ്യമല്ല. 

സമൂഹത്തോട് പ്രതിബന്ധതയുള്ള ഒരു ജ്യോതിഷന്‍ പ്രവചനങ്ങള്‍ നടത്തുമ്പോള്‍ അതിന്റെ ആധികാരിതക്ക് വേണ്ടി അവയുടെ യുക്തി ഭദ്രമായ പ്രമാണങ്ങള്‍ തീര്‍ച്ചയായും നല്‌കേണ്ടതാണ്. എങ്കില്‍ മാത്രമേ ആ പ്രവചങ്ങള്‍ പൂര്‍ണ്ണമാകൂ. കേരളത്തിലെ പ്രധാന ജ്യോതിഷ പ്രമാണിക ഗ്രന്ഥങ്ങള്‍ ഹോരാശാസ്ത്രം, പ്രശ്‌ന മാര്‍ഗ്ഗം, ജാതക പാരിജാതം, ജാതകാദേശം, ദശധ്വായി മുതലായവയാണ്. അതു കൊണ്ട് തന്നെ ഇവിടെ പ്രവചനങ്ങള്‍ക്ക് ഉപോല്‍ഫലകമായ് പ്രമാണങ്ങളും ചേര്‍ക്കുന്നു. ജ്യോതിഷ തല്പരര്‍ക്ക് ജ്യോതിഷത്തിന്റെ ആധികാരികത മനസ്സിലാക്കുവാനും, ജ്യോതിഷ വിദ്യാര്‍ത്ഥികള്‍ക്ക് ഇതൊരു മാര്‍ഗ്ഗ നിര്‍ദ്ദേശവും ആവുമെങ്കില്‍ ലേഖകന്റെ പരിശ്രമം പൂര്‍ണ്ണമാകും. 

ലഗ്നം: കുട്ടിയുടെ ലഗ്നം തുലാം രാശിയിലാണ്. തുലാം മനുഷ്യ രാശിയാണ്. മനുഷ്യരാശി ലഗ്നമായുള്ള ജനനം ഉത്കൃഷ്ടമാണ്. നല്ല ആരോഗ്യവും ശരീരികമായ് ശുഭഫലങ്ങളും പ്രദാനം ചെയ്യും. 

ലഗ്നത്തില്‍ ഉച്ചസ്ഥനായ ശനി നില്‍ക്കുന്നു. ഇവിടെ ശനി നാലാം ഭാവാധിപനും അഞ്ചാം ഭാവാധിപനും കൂടിയായതു കൊണ്ട്, ശനി ഈ ജാതകത്തില്‍ യോഗകാരകനാണ്. ഈ ഒരൊറ്റ യോഗം കൊണ്ട് തന്നെ ഈ പെണ്‍കുട്ടി ലോക പ്രശസ്തയാകുമെന്ന് പറയുവാന്‍ സാധിക്കും. ശനി ഉച്ചസ്ഥനായ് ലഗ്നത്തില്‍ നില്‍ക്കുന്നത് ശശ മഹായോഗം എന്ന പഞ്ചപുരുഷ യോഗമാണ്. കൂടാതെ ശനി അംശിച്ചിരിക്കുന്നതും ഉച്ചത്തില്‍ തന്നെയാണ്. " ഗ്രഹാണാം അംശകം ബലം " എന്ന പ്രമാണപ്രകാരവും വളരെ ശക്തിമാനായ ശനി ലഗ്നത്തില്‍ വര്‍ഗ്ഗോത്തമം ചെയ്തിരിക്കുന്നു. ' വര്‍ഗ്ഗോത്തമെ ദ്വിഗുണ ' എന്ന ഗുരു വാക്യവും കൂടി കൂട്ടി വായിച്ചാല്‍ ഈ ജാതകത്തില്‍ ശനിക്കു ഉച്ചത്തില്‍ നില്ക്കുന്നതിന്റെ രണ്ടിരട്ടി ശക്തിയാണ്. 

ഇപ്രകാരത്തില്‍ വളരെ ശക്തിമാനായ ശനിയെ കൊണ്ടുള്ള പഞ്ചമഹാപുരുഷ യോഗം ഈ ജാതകത്തില്‍ പറയുന്നത് അസാധാരണമായ ശക്തിയും അസാധാരണമായ ഗുണഗണങ്ങളേയുമാണ്. 

ദ്രേക്കാണ ഫലം 

" ഭൂഷിതോ വരുണവല്‍ ബഹുരത്‌നെര്‍ 

ബ്ബദ്ധരുണ കവചസ്സധനുഷ്‌ക 

നൃത്തവാദിതകുലാസു ച വിദ്വാന്‍ 

കാവ്യകൃന്മിഥുന രാശ്യവസാനേ. "

(ഹോരാ ശാസ്ത്രം- അദ്ധ്യായം 25 ശ്ലോകം 9)

മിഥുനത്തിന്റെ അന്ത്യ ദ്രേക്കാണത്തില്‍ ജനിക്കുന്നവര്‍ വരുണന്‍ പോലെ ബഹുക്കളായിരിക്കുന്ന രത്‌നങ്ങള്‍ കൊണ്ടു അലങ്കരിക്കപ്പെട്ടവനായിട്ടും, നൃത്തസംഗീതാദികളില്‍ സാമര്‍ത്ഥ്യമുള്ളവനായിട്ടും, കാവ്യത്തെ നിര്‍മ്മിക്കുന്നവനായിട്ടുമിരിക്കുന്ന പുരുഷന്റെ ആകൃതിപോലെ ഇരിക്കുന്നവനുമായിരിക്കും. 

മിഥുനത്തിന്റെ മൂന്നാം ദ്രേക്കാണം പ്രതിനിധീകരിക്കുന്നത് രത്‌നധാരിണിയായ, പുഷ്പിണിയായ, സകല കലകളിലും വല്ലഭയായ കാവ്യഗുണമുള്ള മഹിളയെയാണ്. ഈ പറഞ്ഞ ഗുണങ്ങള്‍ തീര്‍ച്ചയായും ഈ ജാതകക്ക് പ്രതീക്ഷിക്കാം. 

ത്രിംശാംശ ഫലം 

" ദുഷ്ട പുനര്‍ഭൂസ്സുഗുണാ കലാജ്ഞാ 

ഖ്യാതാ ഗുണൈശ്ചാസുര പൂജിതര്‍ക്ഷേ 

സ്യാല്‍ കാവടീ ക്ലീബ സമാസതീച 

ബൌധേ ഗുണാഢ്യാ പ്രവികീര്‍ണ്ണകാമാ "

(ഹോരാ ശാസ്ത്രം- അദ്ധ്യായം 22, ശ്ലോകം 4) 

ഇടവം, തുലാം രാശികളില്‍ വെച്ച് ചന്ദ്രന്‍ , ശുക്രന്‍ ത്രിംശാംശകത്തില്‍ ജനിച്ചവള്‍ സൌമ്യശീലാദി ഗുണങ്ങള്‍ കൊണ്ടു ലോകത്തില്‍ പ്രസിദ്ധയായ് ഭവിക്കും. 

ത്രിംശാംശ ലഗ്നം ധനു ആയതു കൊണ്ടു വ്യാഴത്തിന്റെ ത്രിംശാംശകഫലം, ജാതക സുന്ദരിയും ഭര്‍ത്താവിനോടും പുത്രന്മാരോടും കൂടിയവളുമായിരിക്കും. 

ചന്ദ്രന്‍ അംശയിച്ചിരിക്കുത് ശുക്രക്ഷേത്രത്തില്‍ ആയതിനാല്‍ , സൌന്ദര്യാദി ഗുണങ്ങളെ കൊണ്ടു ലോകപ്രസിദ്ധയും ആയിരിക്കും. 

ജാതകയുടെ ജീവിതത്തിലെ വൈഷമ്യഘട്ടം.

ലഗ്നാധിപനും എട്ടാം ഭാവാധിപനുമായ ശുക്രന്‍ രണ്ടാം ഭാവത്തില്‍ , ഒന്‍പതാം ഭാവാധിപനും പന്ത്രണ്ടാം ഭാവധിപനുമായ ബുധനോട് യോഗം ചെയ്തും എട്ടില്‍ നില്‍ക്കുന്ന ഗുളികന്‍ ദൃഷ്ടി ചെയ്തും നില്‍ക്കുന്നു. 

ലഗ്നാധിപനും എട്ടാം ഭാവാധിപനുമായ ശുക്രന്‍ ധനം, കുടുംബം, പ്രാഥമിക വിദ്യാഭ്യാസം എന്നിവയുടെ ഭാവമായ രണ്ടില്‍ നില്‍ക്കുന്നത് വളരെ നല്ലതാണെങ്കിലും ഗുളിക ഭാവാധിപനായ ശുക്രന്‍ ആയുര്‍ഭാവമായ എട്ടിലേയ്ക്ക് ദൃഷ്ടി ചെയ്യുന്നത് നല്ലതല്ല. 

പ്രമാണം ശ്രദ്ധിക്കുക. 

" ഗുളിക ഭവന രാശീശ്വന്‍ നിന്നഭാവമനര്‍ത്ഥം 

   നോക്കുന്ന ഭാവം അതി കഷ്ട ഫലപ്രദം" 

ഒരു ജാതകത്തില്‍ ഗുളിക ഭവനനാഥനേക്കാള്‍ ഗുരുതരമാണ് ഗുളിക ഭവനനാഥന്‍ ആയുര്‍ ഭാവമായ എട്ടിലേക്കു ദൃഷ്ടിചെയ്യുന്നത്. ഗുളിക ഭവനനാഥനായ ശുക്രന്‍ മാരക സ്ഥാനമായ രണ്ടില്‍ ഒന്‍പത്, പന്ത്രണ്ടു ഭാവധിപനായ ബുധനോടും രാഹുവിനോടും യോഗം ചെയ്തിരിക്കുന്നു. ഈ ഭാവത്തെ മാരകാധിപനായ കുജന്‍ വിശേഷാല്‍ ദൃഷ്ടിയോടെ വീക്ഷിക്കുന്നു. 

ഈ പെണ്‍കുട്ടി ജനിച്ചിരിക്കുന്നത് ഗുരു ദശയിലാണ്. ഗുരുദശ അവസാനിക്കുന്നത് 13-03-2019 ല്‍ ആണ്. കൂടാതെ ഗുരു ഈ ജാതകത്തില്‍ ആറാം ഭാവാധിപനും ലഗ്നാധിപന്റെ ശത്രുവും ആണ്. ആ ലഗ്നാധിപനെ മാരകാധിപനായ കുജന്‍ ദൃഷ്ടി ചെയ്യുന്നു. ഇവയില്‍ നിന്നു ഗുരുദശ, ജാതകക്ക് വളരെ ശ്രദ്ധിക്കേണ്ട സമയമാണെന്ന് പറയാം. ഈ ജാതകത്തില്‍ വളരെ കഠിനമായ ബാലാരിഷ്ടതയുണ്ടെന്നു പറയാം. 

പക്ഷെ, 

" ഏക ഏവ സുരരാജ പുരോഹിത 

കേന്ദ്രഗോ അദ നവ പഞ്ചമ ഗോവാ 

ലാഭഗോ യെത്ര വിലഗ്നെ തദാ 

ശേഷ ഗജരെ ആപല്‍ കിം ഫലം." 

സുരരാജ പുരോഹിതനായ ഗുരു ഒരു ജാതകത്തില്‍ ഏകനായ് ലഗ്നത്തിന്റെ കേന്ദ്രസ്ഥാനമായ 1, 4, 7, 10 ഭാവങ്ങളിലോ ത്രികോണമായ 5, 9 ലോ 11 ലോ നിന്നാല്‍ മറ്റ് ഒരു ഗ്രഹത്തിനും ബലമില്ലെങ്കില്‍ പോലും ഒന്നും പേടിക്കാനില്ല. 

കൂടാതെ ഗുരു ഈ ജാതകത്തില്‍ വക്രത്തിലാണ്. വക്രനായ ഗുരുവിനുള്ള ശ്ലോകം " വക്രേതു ത്രിഗുണ എന്നാണ് ". എന്നു പറഞ്ഞാല്‍ ഈ ജാതകത്തില്‍ ഗുരു മൂന്നിരട്ടി ബലവാനാണ്. 

അതിനാല്‍ ഈ ജാതകത്തില്‍ ദോഷം ഇല്ലാതാക്കപ്പെടുന്നു എന്നു തന്നെ പറയാം. 

ലഗ്നാധിപന്‍ രണ്ടില്‍ ഭാഗ്യാധിപന്റെ യോഗത്തില്‍ നില്‍ക്കുന്നതും, രണ്ടാം ഭാവാധിപന്‍ അഭീഷ്ടസ്ഥാനമായ പതിനൊന്നില്‍ ഗുരുവിന്റെ ദൃഷ്ടിയോടെ നില്‍ക്കുന്നതില്‍ നിന്ന് ജാതക ഉന്നത കുല ജാതയാണെന്നു നിസ്സംശയം പറയാം. 

മാത്രമല്ല, 

" ലക്ഷം ദോഷാന്‍ ഹന്തി ദേവേന്ദ്ര പൂജ്യ കേന്ദ്രം പ്രാപ്‌തോ "

(ജാതകാദേശം അദ്ധ്യായം 5 ശ്ലോകം 12) 

ഗുരുവിനാല്‍ അരിഷ്ടഫലങ്ങളെ നശിപ്പിക്കുവാന്‍ ഏറ്റവും അധികം ശക്തിയുള്ളത്. ഗുരു കേന്ദ്രത്തില്‍ നിന്നാല്‍ ഒരു മാതിരിപ്പെട്ട എല്ലാ ദോഷങ്ങളും നശിക്കുന്നതാണ് 

സമ്പത്ത്, വരുമാനം

ഈ ജാതകത്തില്‍ രണ്ടാം ഭാവാധിപന്‍ പതിനൊന്നിലും, പതിനൊന്നാം ഭാവാധിപന്‍ രണ്ടിലും നില്ക്കുന്നു. ജാതകാദേശം എന്ന ജ്യോതിഷ ഗ്രന്ഥത്തില്‍ ഈ യോഗത്തെ പരാമര്‍ശിച്ചിട്ടുണ്ട് 

" ധനാധി പേ ലാഭഗതേ, ലാഭേശേ 

ധനമാഗതേ താവുഭൌ കേന്ദ്രഗൌ 

വാ അപി ധനലാഭമുദീരയേത് "

(ജാതകാദേശം അദ്ധ്യായം 8, ശ്ലോകം 16)

ഈ ശ്ലോകത്തിനര്‍ത്ഥം രണ്ടാം ഭാവാധിപന്‍ പതിനൊന്നിലും പതിനൊന്നാം ഭാവാധിപന്‍ രണ്ടിലും നില്ക്കുകയോ അല്ലെങ്കില്‍ ഈ രണ്ട് ഗ്രഹങ്ങളും കേന്ദ്രത്തില്‍ നില്ക്കുകയോ ചെയ്താല്‍ വളരെ ധനം സമ്പാദധിക്കുന്നതാകുന്നു. മുകളില്‍ കൊടുത്തിരിക്കുന്ന ഭാവ പട്ടിക പ്രകാരം ഈ ജാതക വളരെയധികം സ്വത്തിനുടമയായിത്തീരും എന്നതില്‍ സംശയമില്ല. 

വളരെ പ്രധാനപ്പെട്ട കാര്യം രാശിചാര്‍ട്ടില്‍ ചന്ദ്രന്‍ മിഥുന രാശിയിലായിരുന്നു. അങ്ങനെ വരുമ്പോള്‍ ചന്ദ്രന്റെ രണ്ടിലും പന്ത്രണ്ടിലും ഗ്രഹങ്ങള്‍ ഇല്ലാത്തതു കൊണ്ട് സാധാരണ ജ്യോത്സ്യന്മാര്‍ ഈ ജാതകത്തില്‍ കേമുദ്രമ യോഗം ഉണ്ടെന്നു പറഞ്ഞേക്കാം. പക്ഷെ ഭാവ ചാര്‍ട്ട് ശ്രദ്ധിച്ചാല്‍ ചന്ദ്രന്‍ കര്‍ക്കിടകത്തില്‍ ആണെന്ന് കാണാം. ഭാവ ചാര്‍ട്ട് പ്രകാരം ഈ ജാതകം രാശി ചാര്‍ട്ട് പ്രകാരമുള്ളതില്‍ നിന്ന് തികച്ചും വ്യത്യസ്തമാകുന്നു. അങ്ങനെ വരുമ്പോള്‍ ചന്ദ്രാല്‍ രണ്ടില്‍ കുജന്‍ നില്‍ക്കുന്നു. ഇത് സുനഭായോഗമാണ്. കൂടാതെ ഗുരു ചന്ദ്രന്റെ കേന്ദ്രത്തില്‍ വരുകയും ചെയ്യുന്നു. ഈ യോഗത്തെ അടിസ്ഥാനമാക്കുന്ന ശ്ലോകം താഴെപ്പറയുന്നു. 

" ഹന്തി സര്‍വ്വ ഗ്രഹാരിഷ്ടം ചന്ദ്ര കേന്ദ്രെ 

ബിബൃഹസ്പതി, യഥാ ഗജ സഹസ്രാണി 

നിഹന്ത്യെ കോടപി കേസരി "

ചന്ദ്രന്‍ കേന്ദ്രത്തില്‍ നില്‍ക്കുന്ന ഗുരു സകല അരിഷ്ട യോഗഫലങ്ങളെയും അനേകായിരം ആനകളെ ഒറ്റയ്ക്ക് നശിപ്പിക്കാന്‍ കഴിയുന്ന ഒരു സിംഹത്തെ പോലെ നശിപ്പിച്ച് കളയും എന്നാണ് ഗജകേസരി യോഗമെന്ന ഈ യോഗം കൊണ്ട് പറയുന്നത്. 

ഇപ്രകാരത്തില്‍ ഈ ജാതകത്തില്‍ കേമുദ്രമ യോഗം ഇല്ലെന്നും, സകല അരിഷ്ട യോഗങ്ങളും ഇങ്ങനെ ഇല്ലതാകുന്നുവെന്നും മനസ്സിലാക്കാം. 

പാരമ്പര്യ സ്വത്തുകള്‍

പാരമ്പര്യ സ്വത്തുക്കളെക്കുറിച്ച് പറയുന്നത് രണ്ടാം ഭാവത്തിനോ എട്ടാം ഭാവത്തിനോ പതിനൊന്നാം ഭാവത്തിന്റെയും (ലാഭ സ്ഥാനം) ലഗ്നത്തിന്റെയും (വ്യക്തി ) ഒന്‍പതാം ഭാവത്തിന്റെയും (ധന സ്ഥാനം, പൂര്‍വ്വിക ധനം) ബന്ധമുണ്ടെങ്കില്‍ ആ ജാതകന് തീര്‍ച്ചയായും പാരമ്പര്യ സ്വത്ത്‌ അനുഭവിക്കാന്‍ യോഗമുണ്ടാകും. 

സംസാരം, വാക്കുകള്‍ 

സംസാരത്തെ കുറിച്ച് ചിന്തിക്കുന്നത് രണ്ടാം ഭാവം കൊണ്ടാണ്. ഈ ജാതകത്തില്‍ രണ്ടില്‍ ബുധനും ശുക്രനും നില്‍ക്കുന്നു. 

" ദ്വാഗമീ ഭൂ ഗണ പ സ്സിതേന "

നല്ല വാക്കിനുടമയും നല്ല വാഗ്മിയും ഒരു സംഘത്തിന്റെ അധിപനും ആയിരിക്കും. ഇതില്‍ നിന്നും ജാതക നല്ല സ്വരത്തിനുടമ ആയിരിക്കുമെന്ന്‍ പറയാന്‍ സാധിക്കും. 

രണ്ടാം ഭാവത്തെ രണ്ടാം ഭാവാധിപന്‍ ദൃഷ്ടി ചെയ്യുന്നതില്‍ നിന്ന് ജാതക ശക്തമായ വാക്കുകള്‍ക്ക് ഉടമയായിരിക്കും എന്ന് പറയാം. രണ്ടാം ഭാവാധിപന്‍ കുജന്‍ ദൃഷ്ടി ചെയ്യുന്നത് ബുധനെയും രാഹുവിനേയും ആയത് കൊണ്ട് ജാതക വളരെ കഠിന പദപ്രയോഗങ്ങളു പയോഗിച്ചേക്കാം. 

രണ്ടാം ഭാവാധിപന്‍ രണ്ടിലേക്ക് ദൃഷ്ടിചെയ്യുന്നത് ആ ഭാവത്തെ കൂടുതല്‍ ബലപ്പെടുത്തുന്നു. കൂടാതെ രണ്ടാം ഭാവധിപന്‍ ദൃഷ്ടി ചെയ്യുന്നത് വാക്ക്‌ കാരകനായ ബുധനെ ആയതുകൊണ്ട് ഈ പെണ്‍കുട്ടി തര്‍ക്കങ്ങളില്‍ ശോഭിക്കുകയും, ബച്ചന്‍മാരെ പോലെയോ അതിലേറെയോ ഡയലോഗുകള്‍ കൊണ്ട് പ്രശസ്തയാകും. 

രാഹു രണ്ടാം ഭാവധിപനായ കുജന്റെ ബന്ധത്തോടെ ആറാം ഭാവധിപനായ ഗുരുവിന്‍റെ ദൃഷ്ടിയില്‍ നില്‍ക്കുന്നത് കൊണ്ട് ജാതക തീര്‍ച്ചയായും നിരവധി വിദേശ ഭാഷകളില്‍ അഗാഥ പാണ്ടിത്യത്തിനുടമ ആയിരിക്കുമെന്ന് നിസംശയം പറയാം. 

ശുക്രനും ബുധനും യോഗം ചെയ്തു രണ്ടില്‍ നില്‍ക്കുന്നതുകൊണ്ട് ഈ പെണ്‍കുട്ടിയുടെ മുഖം എല്ലായ്പ്പോഴും ഓമനത്വമുള്ളതും സദാ സുസ്മേരവദനയും ആയിരിക്കും. 

കൂടാതെ ശുക്ര ബുധ യോഗം കുട്ടിക്ക് ഗാനാലാപനത്തിലും അഭിനയത്തിലും നല്ല കഴിവുകള്‍ കൊടുക്കുമെന്നതില്‍ സംശയിക്കേണ്ട. 

ഇളയ സഹോദരന്മാര്‍

ഇളയ സഹോദരന്മാരെ ചിന്തിക്കുന്നത് മൂന്നാം ഭാവത്തെ കൊണ്ടാണ്. സഹോദര കാരകനായ കുജന്‍ അഭിഷ്ട സ്ഥാനമായ പതിനൊന്നില്‍ നില്‍ക്കുന്നു, മൂന്നാം ഭാവാധിപനായ ഗുരു വളരെ ശക്തനായ്‌ സഹോദര കാരകനായ കുജനെയും മൂന്നാം ഭാവത്തേയും ദൃഷ്ടി ചെയ്യുന്നു. പ്രമാണ പ്രകാരം 

" യസ്യ യസ്യ വിലഗ്നേന സംബന്ധോ 

  ലാഗ്നപേന വാ ദ്യഗ്യോഗ കേന്ദ്രഗത്യാ 

   ദ്യെ സസഭാവാനു ഭൂയതേ ഇതി "

(പ്രശ്ന മാര്‍ഗ്ഗം അദ്ധ്യായം 14 ശ്ലോകം 43 )

ഏതൊരു ഭാവത്തിനു ലഗ്നവുമായ്‌ ദൃഷ്ടി, യോഗം, കേന്ദ്രസ്ഥിതി, നവാംശം മുതലായവ കൊണ്ട്ബന്ധപ്പെടുന്നുവോ ആ ഭാവം ജാതകന്‍ തീര്‍ച്ചയായും അനുഭവിക്കാന്‍ ഭാഗ്യമുണ്ടാകും. 

അത് കൊണ്ട് ഈ ജാതകക്ക് തീര്‍ച്ചയായും ഇളയ സഹോദരങ്ങള്‍ ഉണ്ടാകും. 

ഗുരു ദശയില്‍ ചന്ദ്ര അപഹാര കാലത്ത്‌ അത് സംഭവിക്കുവാനാണ് കൂടുതല്‍ സാധ്യത. അതായത് 12-7-2014 നും 11-11-2015 ഇടക്ക്. ഗുരു മിഥുനത്തില്‍ സഞ്ചരിക്കുന്ന 31-5-2013 നും 19-6-2014 ഇടക്കുള്ള സമയത്തും ഐശ്വര്യാ റായ്ക്ക് രണ്ടാമത്തെ കുട്ടി ജനിക്കുവാനുള്ള കൂടുതല്‍ സാധ്യത. 

ഗുരു ശക്തനായ്‌ മൂന്നാംഭാവത്തെ ദൃഷ്ടി ചെയ്യുന്നത് കൊണ്ടും മൂന്നാം ഭാവം ഓജരാശി ആയത് കൊണ്ടും ആ കുട്ടി ആണ്‍കുട്ടി ആവാനാണ് കൂടുതല്‍ സാധ്യത. അവന്‍ ശക്തനും പ്രസിദ്ധനും മൂത്ത സഹോദരിയെ സഹായിക്കുന്ന സ്നേഹ സമ്പന്നനും ആയിരിക്കും.

കാര്‍ക്കശ്യ സ്വഭാവം. 

അഞ്ചാം ഭാവധിപനായ ശനിയും മൂന്നാം ഭാവധിപനായ ശക്തനായ ഗുരുവും അന്യോന്യം ദൃഷ്ടി ചെയ്യുന്നത് കൊണ്ട് ജാതക വളരെ കാര്‍ക്കശ്യ സ്വഭാവത്തിനുടമയും വളരെ സാഹസികയും ആയിരിക്കുമെന്ന് പറയാം. 

വിദ്യാഭ്യാസം 

പ്രാഥമിക വിദ്യാഭ്യാസം ചിന്തിക്കുന്നത് രണ്ടാം ഭാവം കൊണ്ടും ഉന്നത വിദ്യാഭ്യാസം ചിന്തിക്കുന്നത് നാലാം ഭാവം കൊണ്ടും ചിന്താശക്തിയും ഓര്‍മ്മ ശക്തിയും പറയുന്നത് അഞ്ചാം ഭാവത്തിന്‍റെ ബലവും നീരിക്ഷണം നടത്തിയിട്ടാണ്. 

രണ്ടാം ഭാവധിപനായ കുജന്‍ നില്‍ക്കുന്നത്‌ പതിനൊന്നിലും രണ്ടാം ഭാവത്തില്‍ ലഗ്നനാധിപനും എട്ടാം ഭാവധിപനുമായ ശുക്രനും രാഹുവും. ഇവിടെ ശുക്രന്‍ ഗുളിക ഭാവനാധിപന്‍ കൂടിയാണ്. മാത്രമല്ല രണ്ടാം ഭാവധിപനെ ആറാം ഭാവധിപന്‍ ദൃഷ്ടി ചെയ്യുന്നു. ഈ ലക്ഷണങ്ങള്‍ പറയുന്നത് പ്രാഥമിക വിദ്യാഭ്യാസ കാലഘട്ടത്തില്‍ ആരോഗ്യ പ്രശ്നങ്ങള്‍ കൊണ്ടു തടസ്സങ്ങള്‍ ഉണ്ടായേക്കാം എന്നാണ്. ഇത് പ്രധാനമായും സംഭവിക്കുന്നത് ഗുരുവിന്‍റെ ദശയിലായിരിക്കും. ജാതകക്ക് ഗുരു ദശ 13-3-2019 വരെയാണ്. അതായത്‌ എട്ടു വയസ്സുവരെ. 

ഉന്നത വിദ്യാഭ്യാസം 

നാലാം ഭാവം കൊണ്ടാണല്ലോ ഉന്നത വിദ്യാഭ്യാസം ചിന്തിക്കുന്നത്. നാലാം ഭാവം ഉന്നത വിദ്യാഭ്യാസ വിഷയവും അഞ്ചാം ഭാവം ഓര്‍മ്മ ശക്തിയുമാണ് സൂചിപ്പിക്കുന്നത്. ജാതകയുടെ നാലും അഞ്ചും ഭാവാധിപന്‍ ശനിയാണ്. ശനി ഈ ജാതകത്തില്‍ യോഗകാരകന്‍ കൂടിയാണ്. കൂടാതെ ശനി ഉച്ചനായ്‌ നില്‍ക്കുന്നു. ഇതില്‍ നിന്നും ഈ പെണ്‍കുട്ടി ശ്രേഷ്ഠമായ വിശേഷ ബുദ്ധിയുള്ളവളും, പെട്ടെന്ന്‍ കാര്യങ്ങള്‍ ഗ്രഹിക്കാന്‍ കഴിവുള്ളവളും, കൌശലക്കാരിയും, നല്ല വിദ്യാസമ്പന്നയും ആയിരിക്കും എന്നതില്‍ സംശയമില്ല. 

നാലും അഞ്ചും ഭാവധിപനായ ശനിയെ യാത്രാഭാവത്തില്‍ നില്‍ക്കുന്ന അന്യദേശകാരകനായ ആറാം ഭാവാധിപന്‍ ഗുരു വീക്ഷിക്കുന്നു. കൂടാതെ ശനി നില്‍ക്കുന്നത്‌ ചരരാശിയിലുമാണ്. അത് കൊണ്ടുതന്നെ ശനിയുടെ ദശകാലത്ത്‌ ജാതക ഉന്നത പഠനത്തിനായ്‌ വിദേശ രാജ്യങ്ങളില്‍ യാത്ര നടത്തുമെന്ന് മനസ്സിലാക്കാം. അത് സ്ഥിരവുമായിരിക്കില്ല. 

വ്യാപരവുമായ്‌ ബന്ധപ്പെട്ട ഉന്നത വിദ്യാഭ്യാസം 

ഈ ജാതകത്തില്‍ വിദ്യാ ഭാവധിപനായ ശനി ചരരാശിയായ ശുക്ര ക്ഷേത്രത്തില്‍ നില്‍ക്കുന്നു, ബലവാനായ വക്ര ഗുരു ശനിയെ വീക്ഷിക്കുന്നു. ഇതില്‍ നിന്നും ജാതക വിദേശത്ത്‌ അഭിനയ മേഖലയുമായ്‌ ബന്ധപ്പെട്ടതോ സിനിമയുമായ്‌ ബന്ധപ്പെട്ടതോ ആയ വിഷയത്തില്‍ ഉന്നത വിദ്യാഭ്യാസം നേടും. 

ജാതകത്തില്‍ മാധ്യമങ്ങളെ (മീഡിയ) കുറിച്ച് ചിന്തിക്കുന്നത് അഞ്ചാം ഭാവത്തെയും മൂന്നാം ഭാവത്തെയും കൊണ്ടാണ്. അഞ്ചാം ഭാവധിപനും കര്‍മ്മഭാവമായ പത്താം ഭാവവും തമ്മില്‍ യോഗ, ദൃഷ്ടി ബന്ധം വന്നാല്‍ ജാതക പഠിച്ചവിഷയത്തില്‍ തന്നെ ജോലി ചെയ്യും എന്നുറപ്പിക്കാം. 

കൂടാതെ നാലാം ഭാവം ഉച്ചരാശിയായ കുജന്‍ സര്‍വ്വാഭിഷ്ടസ്ഥാനമായ പതിനൊന്നില്‍ നില്‍ക്കുന്നു. അഥവാ വിദ്യാഭാവത്തില്‍ ജനിച്ച കുജന്‍ അഭീഷ്ട സ്ഥാനത്ത് നിന്ന്‍ ലഗ്നാധിപനായ ശുക്രനെ വീക്ഷിക്കുന്നു. കുജന്‍ സാഹസത്തിന്‍റെ കാരകന്‍ കൂടിയായത് കൊണ്ട് ജാതകക്ക് കായിക വിനോദങ്ങളില്‍ നല്ല ആഴത്തിലുള്ള വിജ്ഞാനം ഉണ്ടാകുമെന്ന് പറയാം. കുജന്‍ അഞ്ചിലേക്ക് ദൃഷ്ടി ചെയ്യുന്നതും ദ്വിഗ്രഹ യോഗങ്ങള്‍ ആയ ബുധന്‍ + കുജന്‍ , ശുക്രന്‍ + കുജന്‍ പറയുന്നത് ഈ പെണ്‍കുട്ടി പരിശീലനം സിദ്ധിച്ച കായികാഭ്യാസിയോ അതിനെക്കുറിച്ച് നല്ല ജ്ഞാനമുള്ളവളോ ആയിതീരുമെന്നാണ്. വിവിദേശ രാജ്യങ്ങളില്‍ നിന്നും ഇതിനനുസരണമായ വിദ്യകള്‍ സ്വായത്തമാക്കിയേക്കും. 

കുജന് ക്രയവിക്രയ ഭാവമായ എട്ടാം ഭാവധിപനായ ശുക്രനോടും ധന സംബന്ധമായ ആറാം ഭാവാധിപനായ ഗുരുവിന്റെയും ബന്ധമുള്ളതു കൊണ്ട് സാമ്പത്തിക ശാസ്ത്രത്തിലും നല്ല ജ്ഞാനമുണ്ടായിരിക്കുമെന്നു പറയാം. 

ലൌകിക കാര്യങ്ങള്‍ : സന്തോഷം, സുഖം 

വാഹനങ്ങള്‍ തുടങ്ങിയ കാര്യങ്ങള്‍ ചിന്തിക്കുന്നത് നാലാം ഭാവം കൊണ്ടാണ്. നാലാം ഭാവാധിപന്‍ ഉച്ചസ്തനായി നില്‍ക്കുന്നതില്‍ നിന്ന്‍ ജാതകക്ക് സകല വിധ സുഖാനുഭവങ്ങളും ലഭിക്കുവാന്‍ ഭാഗ്യമുണ്ടാകുമെന്ന് പറയാം. 

ഭൂസ്വത്ത് 

ഭൂസ്വത്തുകളുടെ അധീനത ചിന്തിക്കുന്നത് നാലാം ഭാവം കൊണ്ടും കാരകനായ കുജനെ കൊണ്ടുമാണ്. നാലാം ഭാവാധിപനായ ശനി ഉച്ചനായ്‌ നില്‍ക്കുമ്പോള്‍ തന്നെ ഭൂകാരകനായ കുജന്‍ അഭീഷ്ട സ്ഥാനത്ത്‌ നില്‍ക്കുന്നു. കൂടാതെ ഉച്ചംപ്രാപിച്ച നാലാം ഭാവധിപനെ ആറാം ഭാവധിപന്‍ നോക്കുന്നു. ആ ആറാം ഭാവധിപന്‍ ബുധ ക്ഷേത്രത്തില്‍ (ലഗ്നാല്‍ ഒന്‍പതില്‍ ) അംശയിച്ചിരിക്കുന്നു. ഇതില്‍ നിന്നും ജാതകക്ക് ലോകത്തിന്‍റെ വിവിധ ഭാഗങ്ങളില്‍ സ്വന്തമായ് ഭൂമിയുണ്ടാകുമെന്നു പറയാം. 

നാലാം ഭാവാധിപന്‍ലഗ്നത്തില്‍ നില്‍ക്കുകയും ബുധന്‍ ലഗ്നാധിപനായ ശുക്രനോടു യോഗം ചെയ്തു നില്‍ക്കുന്നതില്‍ നിന്നും ജാതകക്ക് വളരെയധികം സുഹൃത്തുകള്‍ ഉണ്ടാകുമെന്ന് പറയാം. 

വിവാഹവും സന്താനങ്ങളും 

ഏഴാം ഭാവധിപനായ കുജന്‍ പതിനൊന്നില്‍ സിംഹ രാശിയില്‍ നിന്ന് ലഗ്നാധിപനായ ശുക്രനെ ദൃഷ്ടി ചെയ്യുന്നു. ഇതൊരു നല്ല യോഗമാണ്. ഇതില്‍ നിന്നും പങ്കാളിയുമായ്‌ അഭിപ്രായ വ്യത്യാസങ്ങളൊന്നുമില്ലാതെയുള്ള ഒന്നിച്ചുള്ള ജീവിതത്തെ കാണിക്കുന്നു. 

ഏഴാം ഭാവാധിപനായ കുജന്‍ രാശികളുടെ രാജാവായ രവിയുടെ രാശിയായ സിംഹരാശിയില്‍ ചെയ്യുന്നതുകൊണ്ട് പങ്കാളി പൊതുജനങ്ങളാല്‍ വളരെ ബഹുമാനിക്കപ്പെടുന്ന കുടുംബത്തില്‍ നിന്നായിരിക്കുമെന്നു പറയാം. 

ശക്തനായ ഗുരു ഏഴില്‍ നില്‍ക്കുന്നത് പങ്കാളിയുടെ ആഭിജാത്യത്തെ സൂചിപ്പിക്കുന്നു. 

ആറാം ഭാവാധിപന്‍ കൂടിയായ ഗുരു ഏഴില്‍ നിന്ന്കൊണ്ട് ഏഴാം ഭാവാധിപനായ കുജനെ വിശേഷാല്‍ ദൃഷ്ടിയോടെ വീക്ഷിക്കുന്നത് കൊണ്ട് ഇദ്ദേഹം വേറൊരു സംസ്ഥാനത്തില്‍ നിന്നുള്ള ആളോ അഥവാ വിദേശരാജ്യത്ത് നിന്നുള്ള വ്യത്യസ്ത സംസ്ക്കാരത്തില്‍പ്പെട്ട ആളോ ആവാന്‍ സാധ്യതയുണ്ട്. 

അഞ്ചും ഒന്‍പതും ഭാവങ്ങള്‍ കൊണ്ടാണ് സന്താനങ്ങളെ ചിന്തിക്കുന്നത്. "പഞ്ചമാല്‍ പ്രസവം ചിന്ത്യം " എന്ന് അഞ്ചാം ഭാവത്തെയും "നവമാല്‍ പുത്ര സമ്പത്ത്‌ " എന്ന് ഒന്‍പതാം ഭാവത്തെയും സ്ത്രീകള്‍ക്ക് പറയുന്നു. 

ഇവിടെ ഒന്‍പതാം ഭാവാധിപന്‍ ബുധന്‍ അംശയിച്ചിരിക്കുന്നത് ലഗ്നാധിപന്റെ യോഗം ചെയ്ത് ചരരാശിയിലാണ്. അത് മകരം രാശിയാണ്. അതിന്‍റെ അധിപന്‍ ഉച്ചസ്തനായിരിക്കുന്നത് കൊണ്ടും ജാതകക്ക് തീര്‍ച്ചയായും സന്താനഭാഗ്യമുണ്ടെന്ന് പറയാം. 

മാതാ പിതാക്കളുമായുള്ള സമീപനം 

പിതാവിനെക്കുറിച്ച് പറയുന്നത് ഒന്‍പതാം ഭാവാധിപനെയും പിതൃകാരകനായ രവിയെയും ചിന്തിച്ചാണ്. ഒന്‍പതാം ഭാവധിപന്‍ ബുധന്‍ ലഗ്നാധിപനോടു യോഗം ചെയ്തിരിക്കുകയും പിതൃകാരകനായ രവിയും നീചഭംഗ രാജയോഗം ചെയ്തു ലഗ്നാധിപനോടു യോഗം ചെയ്തിരിക്കുന്നു. ഇതില്‍ നിന്നും ജാതകക്ക് പിതാവില്‍ നിന്ന് എല്ലാവിധ സഹായങ്ങളും പ്രോത്സാഹനങ്ങളും കിട്ടുമെന്ന് പറയാം. രവി ലഗ്നാല്‍ രണ്ടാം ഭാവത്തില്‍ നില്‍ക്കുന്നത്‌ കൊണ്ടും രവി ഭാഗ്യസ്ഥാനത്ത് അംശയിച്ചിരിക്കുന്നത് കൊണ്ടും ജാതകക്ക് പിതാവില്‍ നിന്നും സാമ്പത്തിക സഹായങ്ങള്‍ ലഭിക്കുമെന്ന് പറയാം. 

വളരെ പ്രസിദ്ധമായ "ഹോരാശാസ്ത്രത്തിലെ അദ്ധ്യായം 18, ശ്ലോകം 7-ല്‍" പറയുന്ന" പിതൃതോധികശ്ച " എന്ന വാക്കുകളില്‍ നിന്ന് എഴാമിടത്ത് വ്യാഴം നിന്നാല്‍ അച്ഛനെക്കാള്‍ സുപ്രിദ്ധയും കഴിവുകള്‍ ഉള്ളവളുമായിരിക്കും ജാതകയെന്നു പറയാം. 

അമ്മ: നാലാം ഭാവം കൊണ്ടും ചന്ദ്രനെ കൊണ്ടുമാണ് അമ്മയെ ചിന്തിക്കുന്നത്. നാലാം ഭാവാധിപനായ ശനി ലഗ്നത്തില്‍ ഉച്ചസ്തനും വര്‍ഗ്ഗോത്തമം ചെയ്തും നില്‍ക്കുന്നു. ചന്ദ്രന്‍ ഭാഗ്യസ്ഥാനത്തും. ഇതില്‍ നിന്നും അമ്മയില്‍ നിന്നും വളരെ പ്രോത്സാഹനങ്ങളും സഹായങ്ങളും ഉണ്ടാകുമെന്ന് നിസംശയം പറയാം. 

തൊഴില്‍ അഥവാ ഉദ്യോഗം

തൊഴിലിനെക്കുറിച്ച് ആധികാരികമായ്‌ ചിന്തിക്കുന്നത് ത്രിംശാംശക പട്ടികയില്‍ നിന്നാണ്. ഈ പട്ടികയില്‍ ലഗ്നാധിപനായ ഗുരു അഞ്ചാം ഭാവാധിപനായ കുജനോടു (ഊര്‍ജ്ജദായകനായ) യോഗം ചെയ്തു സ്ഥിരരാശിയില്‍ നില്‍ക്കുന്നു. രാശി ചാര്‍ട്ടിലെ പത്താം ഭാവധിപനായ ചന്ദ്രന്‍ ത്രിംശാംശക പട്ടികയില്‍ പതിനൊന്നില്‍ നില്‍ക്കുകയും ലഗ്നാധിപനായ ഗുരു വീക്ഷിക്കുകയും ചെയ്യുന്നു ഇതൊരു നല്ല ഉദ്യോഗയോഗമുള്ള സംയോഗമാണ്. 

രാശി ചാര്‍ട്ടില്‍ പത്താം ഭാവധിപനായ ചന്ദ്രന്‍ പാരമ്പര്യഭാവമായ ഒന്‍പതില്‍ നില്‍ക്കുന്നു. ഇതില്‍ നിന്നും ജാതകക്ക് അവളുടെ അച്ഛന്‍റെയും മുത്തച്ഛന്റെയും കര്‍മ്മരംഗമായ കലാരംഗത്ത്‌ പ്രശോഭിക്കുമെന്നു പറയാം.

ഭാവ ചാര്‍ട്ടില്‍ പത്താം ഭാവധിപന്‍ പത്തില്‍ സ്വക്ഷേത്രമായ കര്‍ക്കിടകത്തില്‍ നില്‍ക്കുന്നു ഇതൊരു നല്ല യോഗമാണ് . 

"കര്‍മ്മാധിപേ സ്വോച്ചഗതേ 

രാജമന്ത്രീഭവേന്നര സ്വക്ഷേത്ര 

മിത്രഭെ വാടപി പ്രതാപ ബഹുളോഭവത് "

( ജാതകാദേശം - അദ്ധ്യായം 8, ശ്ലോകം 46 )

ഇതിന്‍റെ സാരാംശം പത്താം ഭാവാധിപന്‍ ഉച്ചത്തില്‍ നില്‍ക്കുകയാണെങ്കില്‍ ജാതകന്‍ രാജമന്ത്രിയായ്‌ തീരും. അത് സ്വക്ഷേത്രത്തിലോ ബന്ധുക്ഷേത്രത്തിലോ നില്‍ക്കുന്നെങ്കില്‍ വലിയ പ്രതാപിയായ്‌ത്തീരും എന്നാണ്. 

ഭാവാ ചാര്‍ട്ടില്‍ പതിനൊന്നാം ഭാവാധിപന്‍ രണ്ടില്‍ ലഗ്നാടിപനോടും ഭാഗ്യാധിപനായ ബുധനോടും യോഗം ചെയ്തിരിക്കുന്നു. രവി + ശുക്രന്‍ എന്നാ ദ്വിഗ്രഹയോഗം ശ്ലോകത്തില്‍ പറയുന്നത് 

" ശുക്രേണ രംഗായുധൈര്‍ല്ലബ്ധസ്വം" 

അതായത്‌ ആദിത്യന്‍ ശുക്രനോടു ദ്വിഗ്രഹയോഗം ചെയ്താല്‍ രംഗത്ത്‌ പ്രവേശിച്ചുള്ള നൃത്താഭിനയാദികളില്‍ നിന്നും ലഭിക്കുന്ന ധനത്തോടു കൂടിയവന്‍ ആയിരിക്കുമെന്നാണ്. 

പതിനൊന്നില്‍ നില്‍ക്കുന്ന കുജനെ ഗുരു വീക്ഷിക്കുകയും ശനി അങ്ങോട്ട്‌ ദൃഷ്ടി ചെയ്യുന്നതില്‍ നിന്നും ജാതക ഒരു അഭിനേതാവോ ഡയറക്ടറോ, സിനിമ നിര്‍മ്മാതാവോ ആയിരിക്കുമെന്ന് പറയാം. ഗുരു + കുജന്‍ ഇവരുടെ ദ്വിഗ്രഹ യോഗം പറയുന്നത് ശക്തമായ നേതൃത്വ പാടവത്തെയാണ്. 

ഭാവാചാര്‍ട്ടില്‍ പത്താം ഭാവാധിപന്‍ പത്തില്‍ നില്‍ക്കുന്നതും അങ്ങോട്ട്‌ ഉച്ചനായ അഞ്ചാം ഭാവധിപനായ ശനി വീക്ഷിക്കുന്നതും പൊതുജനങ്ങളും മാധ്യമങ്ങളും ശ്രദ്ധിക്കുന്ന വ്യക്തിത്വം ആണെന്നും അഞ്ചാം ഭാവധിപനും മൂന്നാം ഭാവാധിപനും തമ്മില്‍ ബന്ധം ഉള്ളത് കൊണ്ടു മാധ്യമങ്ങളുമായുള്ള ബന്ധത്തെ തീര്‍ച്ചയായും പറയാം. ഈ പറഞ്ഞ എല്ലാ യോഗ ദൃഷ്ടികളും സൂചിപ്പിക്കുന്നത് ഈ പെണ്‍കുട്ടി സിനിമ രംഗത്ത്‌ ഉണ്ടാകും എന്ന് തന്നെയാണ്. 

ദശ കാലഘട്ടങ്ങള്‍

ശനി ദശ: ശനി ദശ ആരംഭിക്കുന്നത് 13-3-2019 മുതല്‍ 16-03-2022 വരെയാണ്. ശനി യോഗകാരകനും വളരെ ബലവാനും ആയി ശശ യോഗം ചെയ്തു നില്‍ക്കുന്നു. ഇപ്രകാരമുള്ള ശനിയുടെ ദശ ജാതകക്ക് വളരെ അനുകൂലമായിരിക്കും. 

അനേകം വിദേശ രാജ്യങ്ങളില്‍ സഞ്ചരിക്കുകയും അനേക തരത്തിലുള്ള സുഖങ്ങളും പ്രസിദ്ധികളും ആര്‍ജ്ജിക്കുവാനും സാധിക്കും 

ശനിയില്‍ ഗുരുവിന്റെ അപഹാരകാലത്ത് ( 30-8-2035 മുതല്‍ 12-03-2038) വിദേശത്ത്‌ വിദ്യാഭ്യാസം നടത്തും. 

ബുധദശ 

12-3-2038 മുതല്‍ 13-3-2055 വരെയാണ് ബുധ ദശ. അതായത്‌ 27 വയസ്സ് മുതല്‍ 44 വയസ്സ് വരെ. ഈ കാലഘട്ടത്തില്‍ ഗുണ ദോഷ സമ്മിശ്രമായ അനുഭവങ്ങളായിരിക്കും ഉണ്ടാവുക. 

ജാതകത്തില്‍ ബുധന്‍ 9 ന്റെയും 12 ന്റെയും അധിപനാണ്. ഒന്‍പതാം ഭാവധിപനായ ബുധന്‍ നില്‍ക്കുന്നത്‌ ഒന്‍പതില്‍ നിന്ന് ആറാം ഭാവത്തില്‍ ആണ് ( അത് കുജ ക്ഷേത്രവുമാണ്). ഒന്‍പതാം ഭാവം കൊണ്ടു പിതാവിനെ ചിന്തിക്കുന്നത് കൊണ്ടു ഈ സമയത്ത്‌ പിതാവായ അഭിഷേക ബച്ചന് മുറിവുകളുണ്ടാകുവാന്‍ സാധ്യതയുണ്ട് 

പന്ത്രണ്ടാം ഭാവം കൊണ്ടു ചിന്തിക്കുന്നത് നഷ്ടം, ചെലവ്, പതനം എന്നിവയാണ്. 

പന്ത്രണ്ടാം ഭാവധിപന്‍ രണ്ടാം ഭാവത്തില്‍ ലഗ്നാധിപനായ ശുക്രനോടും, രാഹുവിനോടും യോഗം ചെയ്തു നില്‍ക്കുന്നു. ഇങ്ങോട്ട് മാരകനായ കുജന്‍ ദൃഷ്ടി ചെയ്യുന്നു. അത് കൊണ്ടു ഈ ദശയില്‍ പെണ്‍കുട്ടിക്ക് തൊഴിലില്‍ പതനമോ നഷ്ടമോ ഉണ്ടാകാന്‍ സാധ്യത ഏറെയാണ്. 

രണ്ടാം ഭാവാധിപനായ കുജന് പന്ത്രണ്ടാം ഭാവധിപനുമായ്‌ ബന്ധം വന്നത് കൊണ്ടു ഈ ദശാകാലത്ത്‌ സാമ്പത്തിക നഷ്ടത്തിന് സാധ്യത കാണുന്നു. 

മാരകനായ കുജനെ ആറാം ഭാവധിപന്‍ ഗുരുവിന്റെ ബന്ധം വന്നിരിക്കുന്നത് കൊണ്ടു മുറിവുകള്‍ക്കും ചതവുകള്‍ക്കും സാധ്യത കാന്നുന്നു. 

27 വയസ്സ് മുതല്‍ ഈ പെണ്‍കുട്ടിയെ ദിനം പ്രതി മാധ്യമങ്ങളിലൂടെ കാണുവാന്‍ സാധിക്കും. ലഗ്നാധിപന്‍ ശുക്രനും ഭാഗ്യാധിപന്‍ ബുധനും രണ്ടില്‍ നില്‍ക്കുകയും പതിനൊന്നാം ഭാവധിപന്‍ രവിയും രണ്ടാം ഭാവധിപന്‍ കുജനും തമ്മില്‍ പരിവര്‍ത്തനം ചെയ്തിരിക്കുകയും രണ്ടാം ഭാവധിപനും ഏഴാം ഭാവധിപനും കുജന്‍ ആയത് കൊണ്ടു ഈ പെണ്‍കുട്ടിയുടെ ധന വരവ് പൊതു ജനങ്ങളില്‍ നിന്നായിരിക്കുമെന്നു ഉറപ്പാണ്. 

യോഗങ്ങള്‍ 

 ശശമഹാ യോഗം

പഞ്ച മഹാ പുരുഷ യോഗങ്ങളില്‍ഏറ്റവും ശക്തിമത്തായ യോഗമാണിത്. ഈ ജാതകത്തില്‍ ശനി വളരെ ശക്തനും യോഗകാരനും ആയത് കൊണ്ടു ശനിയുടെ ദശ വളരെ ഗുണപ്രദം ആയിരിക്കും. 

നീച്ച ഭംഗരാജ യോഗം: രവി ഈ ജാതകത്തില്‍ നീചനായ്‌ നില്‍ക്കുന്നു. പക്ഷെ ആ രാശിയുടെ അധിപനായ ശുക്രന്റെ ഉച്ചരാശ്യാധിപനായ ഗുരു ലഗ്ന കേന്ദ്രത്തില്‍ നില്‍ക്കുന്നു. നിന് നീച്ചഭംഗമാണ്. ഇതി ന്റെ ഫലം ചക്രവര്‍ത്തി യോഗമാണ്. രവി പതിനൊന്നാം ഭാവധിപനായത് കൊണ്ടു ഇത് വളരെ നല്ല യോഗമാണ്. 

വസുമദ്യയോഗം 

           

ശുഭ ഗ്രഹങ്ങളായ ബുധന്‍ , ഗുരു, ശുക്രന്‍ ഇവര്‍ ലഗ്നാലോ ചന്ദ്രാലോ ഉപചയ രാശികളില്‍ (3, 6, 10,11) സ്ഥിതി ചെയ്യുന്നതെങ്കില്‍ ഈ യോഗം അനുഭവിക്കാന്‍ യോഗമുണ്ട്. 

രാജയോഗം

ലഗ്നാധിപനായ ശുക്രന്‍ ഒന്‍പതാം ഭാവാധിപനായ ബുധനുമായ്‌ യോഗം ചെയ്തിരിക്കുന്നു. 

ബഹു ദ്രവ്യാര്‍ജ്ജന യോഗം

ലഗ്നാധിപന്‍ രണ്ടില്‍ , രണ്ടാം ഭാവധിപന്‍ പതിനൊന്നില്‍ പതിനൊന്നാം ഭാവധിപന്‍ ലഗ്നത്തില്‍ . പല വഴിയിലൂടെ ധനം കൈയില്‍ വരും. വളരെയധികം ധനം ഭാഗ്യനുകൂലത്തില്‍ അനുഭവിക്കാന്‍ സാധിക്കും 

കേദാരയോഗം 

"കേദാരജ കൃഷികര സുബഹുവഭോജ്യ "

(ജാതകാദേശം അദ്ധ്യായം 8, ശ്ലോകം 37)

കേദാര യോഗത്തില്‍ ജനിച്ചവന്‍ കൃഷി ചെയ്യുന്നവനും നല്ല പദാര്‍ത്ഥങ്ങള്‍നന്നായ്‌ ഭക്ഷിക്കുന്നവനുമായിരിക്കും. ഏഴ് ഗ്രഹങ്ങള്‍ നാല് രാശികളില്‍ നില്‍ക്കുന്നു. ഇത് കേദാര യോഗമാണ്. 

വളരെ പ്രധാനപ്പെട്ട യോഗമാണ് അടുത്തത്‌. 

" യദ്യത് ഫലം നരഭവേfക്ഷമമാംഗനാനാം 

തത്തദ്വദേത പതിഷു, വാസയലം വിധേയം 

താസാം തു ഭര്‍ത്തൃമരണം നിധനെവവു 

സ്തു ലഗ്നെന്ദുഗം സു ഭഗതാസ് മയേ പതിശ്ച "

(ഹോരാ ശാസ്ത്രം - അദ്ധ്യായം 22, ശ്ലോകം 1)

സ്ത്രീ ജാതകത്തില്‍ സ്‌ത്രീകള്‍ക്കനുയോജ്യമായി കാണുന്ന എല്ലാ ഫലങ്ങളും സ്തീകള്‍ക്ക് ഉണ്ടാകുമെന്ന് പറയാം. രാജയോഗങ്ങള്‍ മുതലായവ സ്തീ ജാതകത്തില്‍ ഉണ്ടെങ്കില്‍ അതെല്ലാം ഭര്‍ത്താവിനുണ്ടാകുമെന്നു പറയേണ്ടതാകുന്നു. അഥവാ അതെല്ലാം ഭര്‍ത്താവിനുണ്ടാകുമെന്ന് വിചാരിക്കേണ്ടതാകുന്നു. 

"ഗുരു ഭ്യശ്ച ഗ്രഹേ ഭൃശ്ച മയാ ബദ്ധോ യമജ്ഞലി: 

പ്രസന്ന മനസ്‌തേ മേ സത്യാം കുര്‍വ്വത്തു ഭാരതീം ."

ഗുരുക്ക൯മാര്‍ക്കും ഗ്രഹങ്ങള്‍ക്കും വേണ്ടി എന്നാല്‍ ഈ അഞ്ജലിബദ്ധമായ്‌ അവര്‍ക്ക് സന്തുഷ്ട മാനസരായ്‌ എന്റെ വാക്ക്‌ സത്യമാക്കിത്തീര്‍ക്കട്ടെ.